बाहुण्डाँगी । मानव–हात्ती द्वन्द्व व्यवस्थापन तथा वातावरण संरक्षण मञ्चको नयाँ नेतृत्व शनिबार सम्पन्न निर्वाचनमार्फत चयन गरिएको छ । मेचीनगर–४ स्थित विद्या विकास एकेडेमीमा भएको निर्वाचनमा अध्यक्ष पदका उम्मेदवार हरिप्रसाद उप्रेती २५ मतान्तरसहित विजयी बनेका छन् । उनले ३ सय ४३ मत प्राप्त गरेका थिए भने उनका प्रतिद्वन्द्वी टिकाराम सापकोटाले ३ सय १८ मत प्राप्त गरे ।
९ सय ५७ मतदाता रहेको मञ्चको निर्वाचनमा ६ सय ७७ जनाले मतदानमा सहभागिता जनाएका थिए । अध्यक्षतर्फ १६ मत बदर भएको थियो ।
महासचिव पदमा मञ्जिल देवान निर्वाचित भए । देवानले ३ सय ६४ मत प्राप्त गर्दै शंकर लुइँटेल क्षेत्रीलाई पराजित गरे । क्षेत्रीले २ सय ६८ मत पाएका थिए । महासचिवतर्फ ४५ मत बदर भएको थियो ।
त्यसैगरी, कोषाध्यक्षमा सम्झना सारु मगर निर्विरोध चयन भएकी छिन् । अध्यक्ष निरज घिमिरे, महासचिव रमेश दाहाल र कोषाध्यक्ष निर्मला सुवेदीले राजीनामा दिएपछि नयाँ नेतृत्वका लागि निर्वाचन गरिएको निर्वाचन समिति संयोजक चन्द्रशेखर गुरागाईँले जानकारी दिए ।
