५ साउन, विराटनगर । नाबालिका भतिजीको बलात्कारपछि हत्या आरोपमा पक्राउ परेका एक व्यक्तिलाई जिल्ला अदालत मोरङले आजीवन कैद सजाय सुनाएको छ ।
मोरङको धनपालथान गाउँपालिका– ५ का २२ वर्षीय अनिश सरदारलाई थुनछेक बहसकै दिन जिल्ला अदालत मोरङले आजीवन कैद सजाय सुनाएको हो ।
उनले गत असार १४ गते राति भतिजी ७ वर्षीया नाबालिकाको जबर्जस्ती करणीपछि हत्या गरी घरबाट झन्डै सय मिटर पर रहेको दुर्गा आधारभूत विद्यालयको बाटो छेउमा शव राखेका थिए ।
प्रहरी अनुसन्धान प्रतिवेदनका आधारमा सरकारी वकिल कार्यालयले आइतबार जिल्ला अदालत मोरङमा अनिश विरुद्ध मुद्दा दर्ता गरेको थियो ।
सोमबार बयानपछि थुनछेक बहस भएको थियो । थुनछेक बहसकै दिन न्यायाधीश बाबुराम सुवेदीको इजलासले अनिशलाई जन्मकैद सजाय हुने फैसला सुनाएको अदालतका स्रेस्तेदार मणिराम पोखरेलले जानकारी दिए ।
उनका अनुसार अदालतमा बयानका क्रममा आरोपीले कसुर स्वीकार गरेपछि थुनछेक बहस लगत्तै मुलुकी अपराध संहिताको दफा ४१ बमोजिम फैसला भएको हो ।
अदालतले अनिशलाई ७ लाख रुपैयाँ जरिबाना र मृतकका परिवारलाई क्षतिपूर्तिबापत १ लाख रुपैयाँ भराउने फैसला पनि गरेको छ ।.
Source: online khabar
