रविको पक्षमा हस्ताक्षर गरेपछि बाबुरामले भने- ‘नयाँ शक्तिहरूको भ्रूण हत्या गर्न खोजियो’
पूर्वप्रधानमन्त्री डा. बाबुराम भट्टराईले राष्ट्रिय स्वतन्त्र पार्टी (रास्वपा) का सभापति रवि लामिछानेको पक्षमा ऐक्यबद्धता जनाएका छन्। उनले शनिबार रास्वपाको केन्द्रीय कार्यालय, बनस्थली पुगेर पार्टीले सञ्चालन गरेको हस्ताक्षर अभियानमा सहभागी भएका हुन्।
हस्ताक्षरपछि सञ्चारकर्मीहरूसँग कुरा गर्दै डा. भट्टराईले रवि लामिछानेमाथि भइरहेको व्यवहारलाई ‘राजनीतिक प्रतिशोध’ को संज्ञा दिए। उनले पुराना शक्तिहरूले नयाँ र वैकल्पिक शक्तिहरूको ‘भ्रूण हत्या’ गर्न खोजेको आरोप लगाए।
उनले भने - ‘अंग्रेजीमा एउटा भनाइ छ- तपाईं असल भएर मात्र हुँदैन, असल देखिनु पनि पर्छ। लोकतन्त्र भनेको विधिको शासन हो, तर रवि लामिछानेजीको हकमा महिनौंदेखि एकपछि अर्को मुद्दामा हिरासतमा राख्ने र जनप्रतिनिधिको कर्तव्य पूरा गर्न नदिने जुन काम भइरहेको छ, यसले विधिको शासनभन्दा पनि कुनै अर्कै नियतले काम गरेजस्तो देखिन्छ,’ भट्टराईले भने।
उनले महाभारतको प्रसंग जोड्दै थपे, ‘कृष्णको जन्म हुँदैछ र उसले आफ्नो मृत्यु गराउँछ भन्ने थाहा पाएर कंसले बहिनीको गर्भबाट नजन्मिँदै कृष्णलाई मार्न खोजे जस्तै, पुराना शक्तिहरूले नयाँ उदयमान शक्तिहरूलाई त्यसैगरी भ्रूण हत्या गर्न खोज्छन्।’
डा. भट्टराईले अदालतले दोषी प्रमाणित नगरेसम्म कोही पनि निर्दोष हुने सिद्धान्तको स्मरण गराउँदै अहिलेको घटनाक्रमले राजनीतिक प्रतिशोधको गन्ध आएको र त्यो ठीक नभएको बताए।
उनले भने, ‘यो घटनाले प्रकारान्तरले वैकल्पिक र नयाँ शक्तिहरूको उदयको निम्ति आधार तयार पार्दैछ। पुराना शक्तिहरूको गलत हर्कत र नियत आम जनताले बुझ्दैछन्।’
वैकल्पिक र नयाँ शक्तिहरूबीच आधारभूत कुरामा सहकार्य र कतिपय अवस्थामा प्रतिस्पर्धा गर्दै पुराना, भ्रष्ट र पतनशील शक्तिहरूविरुद्ध लड्नुपर्नेमा उनले जोड दिए।
source nagark news
